Beste klimapraksis sau

Helena Elvatun

Dei 20 sauene, gjetarhunden og eg, trivs godt på det vesle småbruket mitt i Folkedal i Hardanger.

Eg har jobba i NLR Vest i 5 år. Fyrst hadde eg kontor i Rosendal, men har no flytta meg innover Hardangerfjorden, då eg fekk moglegheit til å låna meg eit lite småbruk på 16 dekar. Her har eg om lag 20 vinterfôra sau. No har eg kontorplass på Voss, der eg sit saman med mine tre gode kollegaer Gunnlaug Røthe, Mari Aker og Jonas Fortun, samt Knut Erik Ree og rådgjevarar frå Tine, og stortrivs.

Interessa for landbruk har eg alltid hatt med meg. Eg vaks opp på eit gardsbruk i Folkedal, der far min dreiv med mjølkekyr og sau. Eg gjekk jordbruksskulen på Voss, og NMBU på Ås.

I NLR Vest jobbar eg som jordbruksrådgjevar. Dei siste åra har eg også jobba ein del med klima. Dette temaet kjem ikkje bønder vekk frå. Mi interesse er at me får fram forsking og klarar å sjå utsleppa til landbruket i eit større perspektiv. Har du noko på hjarta rundt klima i landbruk, vil eg gjerne høyre frå deg.

Beste klimapraksis sau er i gang

Klimaprat er i fullt firsprang

Metanutslepp,

lystgass og karbon

Åleine kan ein tenkja seg vrang

---

Kan ein ikkje drive med sau,

utan å fylgje MDG sin bjøllesau?

Jo visst, kan ein det

Kom og bli med

på grupperåd sau!

---

Saman skal me dele kunnskap

Klimagrep skal ikkje gje tap

Fire samlingar me har

For single og par

For å unngå sauedrap

---

Norsk kjøt vil vi ha,

vi får heller kutte spa

Når avl vert betre

og fôring rettare,

best på sau skal vi bli, hurra!

---

No skal vi visa folk i by

At ull og kjøt er betre enn fly

Sauer er ålreite

og god til å beite

Så no skal sauekjøt på meny!

---

Påmeldingsskjema finn du her

Les meir om prosjektet her

Flokken er: Leif Trygve Berge, Torleif Bakke Haavik, Åsmund Seljeset, Lise Elvagjeng, Arve Arstein, Ove Sørestrand og Helena Elvatun.

Rådgjevingspakken "Beste klimapraksis sau" fylgjer årsyklusen i saueproduksjonen. Det blir gjennomført fire samlingar gjennom året, der aktuelle tema vert diskutert. Det kjem til å bli sett fokus på å drive klimasmart, som i praksis betyr at du må drive god og lønsam gardsdrift. Dette er ein god moglegheit for deg som ynskjer å optimalisere drifta ved å hauste gode erfaringar frå andre deltakarar, og få fagleg påfyll frå landbruksrådgjevarar.

Rådgjevinga vil verta gjennomført i mindre grupper på 5-12 personar, og det blir lagt stor vekt på erfaringsutveksling. Dette er eit samarbeidsprosjekt mellom NLR Vest, NSG og Vestland bondelag.

Inngangsbilletten til prosjektet er kostnaden av ein grovfôranalyse. Det kan variere, men rettleiande pris er 1000-1500 kr + mva. Pris vil variere etter laboratorium og type analyse (minstekrav er standard + mineral).

Det er avgrensa plassar, 50 deltakarar. Fyrstemann til mølla-prinsippet gjeld.

Påmeldingsskjema finn du her